အမေရိကန်သမ္မတ Joe Biden က သူ့လက်ထက်မှာ အိမ်ဖြူတော်ကို ပထမဆုံးရောက်လာတဲ့ ပြည်ပခေါင်းဆောင် တဦးအဖြစ် ဂျပန်ဝန်ကြီးချုပ် Yoshihide Suga ကို သောကြာနေ့က လက်ခံတွေ့ဆုံပါတယ်။
“ကျနော့်သမ္မတ သက်တမ်းမှာ ပထမဆုံး ပြည်ပက ခေါင်းဆောင်တဦးအဖြစ် အခုလို ရောက်ရှိလာတဲ့ မဟာမိတ် အရင်းအခြာလည်းဖြစ်၊ မိတ်ဖက်ကောင်းလည်းဖြစ်တဲ့ ပုဂ္ဂိုလ်တဦးကို ဝမ်းမြောက်ဝမ်းသာ ကြိုဆိုပါတယ်။” လို့ သမ္မတ Biden က အိမ်ဖြူတော် တွေ့ဆုံပွဲမှာ ပြောလိုက်တာပါ။
၂ နိုင်ငံ ခေါင်းဆောင်တွေ တွေ့ဆုံရာမှာ ဒေသတွင်းမှာ သြဇာအရှိန်အဝါ ချဲ့ထွင်လာနေတဲ့ တရုတ်နိုင်ငံအရေးကို ဦးစားပေး ဆွေးနွေးဖို့လည်း ရှိနေပါတယ်။ တရုတ်နိုင်ငံအပေါ် အားထားနေရတာတွေကို လျှော့ချနိုင်ဖို့နဲ့ တရုတ် Huawei ကုမ္ပဏီရဲ့ 5G မြန်နှုန်းမြင့် အင်တာနက် ဆက်သွယ်မှုနေရာမှာ အစားထိုးနိုင်မယ့် လုပ်ငန်းတွေအတွက် အမေရိကန်နဲ့ ပူးတွဲဆောင်ရွက်ဖို့ ဂျပန်နိုင်ငံက ဒေါ်လာသန်း ၂ ထောင် သုံးစွဲမယ့် အစီအစဉ်တွေကို သဘောတူညီမှု ရရှိလိမ့်မယ်လို့လည်း မျှော်လင့်ရကြောင်းလည်း အမေရိကန် အစိုးရ အဆင့်မြင့် အရာရှိတဦးက ပြောပါတယ်။
တရုတ်နိုင်ငံက သူ့ရဲ့ အစိတ်အပိုင်းတခုအဖြစ် ပြောဆိုထားပြီး၊ တရုတ်အစိုးရက စစ်ရေးအရ တိုးမြှင့်ဖိအားပေးခံနေရတဲ့ ထိုင်ဝမ်ကျွန်းနဲ့ ပတ်သက်လို့လည်း ၂ နိုင်ငံ ခေါင်းဆောင်တွေ တွေ့ဆုံမှုကနေ တရားဝင် ထုတ်ပြန်ချက်တစောင် ထွက်ပေါ်လာမယ်လို့ အမေရိကန် တာဝန်ရှိသူက ပြောပါတယ်။
credit – VOA
