Volkswagen က မြေပြင်ကနေ ဝေဟင်၊ ဝေဟင် ကနေ မြေပြင် ဒေါင်လိုက် ပျံတက်၊ ဆင်းသက် နိုင်တဲ့ eVTOL ခရီးသည်တင် ဒရုန်း နမူနာမော်ဒယ်ကို တရုတ်မှာ ပြသလိုက်ပါတယ်။ ကုမ္ပဏီရဲ့ ပထမဆုံး ခရီးသည်တင် ဒရုန်း ဖြစ်ပြီး Flying Tiger လို့ နာမည်ပေးထားပါတယ်။
နမူနာမော်ဒယ်မှာ ကာဘွန်ထုတ်လုပ်မှု လုံးဝ မရှိတဲ့ ဘက်ထရီ နည်းပညာနဲ့ လက်ရှိ မောင်းသူမဲ့ နည်းပညာတွေကို အခြေခံ တည်ဆောက်ထားပါတယ်။ လေယာဉ် အရှည်က ၁၁.၂ မီတာ ရှိပြီး တောင်ပံအကျယ်က ၁၀.၆ မီတာ ရှိပါတယ်။ ဒေါင်လိုက် ပျံတက်ဖို့ ပန်ကာ ၈ လုံးနဲ့ အလျားလိုက် ပျံသန်းဖို့ ပန်ကာ ၂ လုံး တပ်ဆင်ထားပါတယ်။
တရုတ် လေယာဉ် ထုတ်လုပ်သူ Sunward နဲ့ Volkswagen တို့ ပူးပေါင်းပြီး ဒီဇိုင်းထုတ်ထားတာပါ။
ကုမ္ပဏီက ဒီနှစ် နှောင်းပိုင်းမှာ Flying Tiger ကို စမ်းသပ်ပျံသန်းမှာ ဖြစ်ပြီး ပိုကောင်းလာတဲ့ နမူနာမော်ဒယ်ကို ၂၀၂၃ ခုနှစ်မှာ စမ်းသပ်ပျံသန်းမှာပါ။ နောက်ဆုံး မော်ဒယ်ဟာ ခရီးသည် ၄ ယောက်နဲ့ ခရီးဆောင်အိတ်တွေကို သယ်ဆောင်နိုင်ပြီး ၂၀၀ ကီလိုမီတာ( ၁၂၄ မိုင်) အထိ ပျံသန်းနိုင်မယ်လို့ ကုမ္ပဏီက ပြောပါတယ်။
ကုမ္ပဏီက ကားပိတ်ဆို့တဲ့ မြို့ကြီးတွေမှာ ခရီးသည်တင် ဒရုန်း ယာဉ်ပျံတွေက အရမ်းကို အသုံးဝင်လာမယ်လို့ ပြောပါတယ်။
Ref : inceptivemind
