ထိုင်းနိုင်ငံအတွင်း ရွှေတြိဂံကလာတဲ့ စိတ်ကြွဆေးပြား အများအပြားဖမ်းမိ
ထိုင်းမြန်မာနယ်စပ် ရွှေတြိဂံဒေသကနေ လာတဲ့ မူးယစ်ဆေးဝါးတွေကိုချင်းရိုင်ပြည်နယ်နဲ့ပထုံဌာနပြည်နယ်တွေမှာ ဖမ်းမိခဲ့ပြီး ဒီရက်ပိုင်းအတွင်းမှာပဲ စိတ်ကြွဆေးပြားသန်း ၂၀ လောက်ဖမ်းမိခဲ့ပါတယ်။ ဒီသတင်းကို မအေးအေးမာက ပြောပြပေးမှာပါ။
ထိုင်းမြန်မာနယ်စပ် ချင်းရိုင်ပြည်နယ်ကနေ Pathumthani ပြည်နယ်အတွင်းကို ကုန်တင်ကားတွေနဲ့ စိတ်ကြွဆေးတွေ သယ်ဆောင်လာပြီး ဂိုထောင်တခုအတွင်းမှာ သိုဝှက်ထားရာ ထိုင်းရဲတပ်ဖွဲ့က မတ်လ ၂၃ ရက်နေ့မှာ စိတ်ကြွဆေးပြား ၈,၀၀၀,၀၀၀ ကို ရှာဖွေ ဖမ်းဆီးခဲ့ပြီး မူးယစ်ဆေးဝါးတွေနဲ့အတူ မူးယစ်ဆေးဝါးရောင်းဝယ်သူ ၇ ဦးကိုလည်း ဖမ်းဆီးလိုက်ပါတယ်။
အခုဖမ်းမိခဲ့တဲ့ စိတ်ကြွဆေး ၈,၀၀၀,၀၀၀ ဟာ ထိုင်းမြန်မာနယ်စပ် ချင်းရိုင်ပြည်နယ်ကနေ ဝင်ရောက်လာတဲ့ မူးယစ်ဆေးဝါးတွေဖြစ်ပြီး မူးယစ်ဆေးဝါးမှုနဲ့ ထွက်ပြေးတိမ်းရှောင်နေသူ တရုတ်နွယ်ဖွား တစ်ဦးဖြစ်တဲ့ Narai Sae Lee ရဲ့ မူးယစ်ဂိုဏ်းဝင်တွေက သယ်ယူလာတာဖြစ်တယ်လို့ ထိုင်းအမှတ် ၃ ဒေသ မူးယစ်နှိမ်နင်းရေး ရဲမှူး Pornchai Charoenwong က မတ်လ ၂၄ ရက်နေ့မှာ သတင်းစာရှင်းလင်းခဲ့ပါတယ်။
“ဒီမူးယစ်ဂိုဏ်းဝင်တွေကို ဖမ်းမိနိုင်ဖို့အတွက် ရဲတပ်ဖွဲ့က နောက်ယောင်ခံထောက်လှမ်းနေတာ နှစ်နဲ့ချီ အချိန်ယူရပါတယ်။ ချင်းရိုင်ပြည်နယ်ကနေ ပထုန်ဌာနီပြည်နယ်ထဲမှာ ကုန်လှောင်ရုံ ငှားပြီး စိတ်ကြွဆေးတွေကို လှောင်ထားပြီး နောက်တဆင့်အနေနဲ့ထိုင်းတောင်ပိုင်းပြည်နယ်တွေအထိ ဆက်လက် ဖြန့်ဖြူးနေတာဖြစ်ပါတယ်။” လို့ ထိုင်းဘာသာနဲ့ ပြောသွားတာပါ။
ဒီရက်ပိုင်းမှာပဲ မူးယစ်ဂိုဏ်းတွေဝင်ဟာ မြန်မာနိုင်ငံနယ်စပ်ကနေ လူကယ်ရီတွေနဲ့ စိတ်ကြွဆေးပြားတွေ ပို့ဆောင်နေရာမှာ အသက် ၁၄ နှစ်နဲ့၁၅ နှစ်သာရှိသေးတဲ့ လားဟူ တိုင်းရင်းသူ ခြောက်ဦးကိုလည်း အသုံးပြုခဲ့ကြောင်းကိုလည်း ထိုင်းသတင်းတွေမှာ ဖော်ပြကြပါတယ်။
ထိုင်းမြန်မာနယ်စပ် ရွှေတြိဂံဒေသကနေ သယ်လာတဲ့ စိတ်ကြွဆေးပြားတွေနဲ့ မူးယစ်ဆေးဝါးမျိုးစုံကို ပြီးခဲ့တဲ့ ရက်ပိုင်းအတွင်း ထိုင်း မူးယစ်နှိမ်နင်းရေး တပ်ဖွဲ့ဝင်တွေနဲ့ထိုင်းနယ်ခြားစောင့်တပ်တွေက ပိတ်ဆို့ဖမ်းဆီးခဲ့ရာမှာ စိတ်ကြွဆေး သန်း ၂၀ ကျော်နဲ့ အိုက်စ်လို့ ခေါ်တဲ့ မူးယစ်ဆေး ကီလို ၁,၀၀၀ နဲ့ မူးယစ်ဆေးဝါးအမှုနဲ့ အလိုရှိနေတဲ့ တရားခံ ၂၆ ဦးကိုလည်း ဖမ်းဆီးနိုင်ခဲ့ကြောင်း ထိုင်းအာဏာပိုင်တွေက သတင်းထုတ်ပြန်သွားပါတယ်။ စုစုပေါင်း မူးယစ်ဆေးဝါးတွေရဲ ့ကာလတန်ဖိုးကတော့ ထိုင်းဘတ်ငွေ သန်းပေါင်း ၃,၀၀၀ ကျော်လောက်တန်ဖိုးရှိတယ်လို့ ခန့်မှန်းကြပါတယ်။
ကိုဗစ်ကပ်ရောဂါကာလမှာ အသွားအလာတွေ ကန့်သတ်ထိန်းချုပ်ထားပေမဲ့ မူးယစ်ဆေးဝါး မှောင်ခိုသူတွေကတော့ လမ်းကြောင်းအသစ်တွေနဲ့ တင်သွင်းနေဆဲဖြစ်ကြောင်းကိုလည်း ကုလသမဂ္ဂ မူးယစ်ဆေးဝါးနဲ့ ရာဇဝတ်မှုဆိုင်ရာရုံး (UNODC) က ပြောဆိုထားပါတယ်။ ပြီးခဲ့တဲ့နှစ်ထဲ မြန်မာနိုင်ငံအပါအဝင် အာရှနဲ့ အရှေ့တောင်အာရှဒေသထဲမှာ မူးယစ်ဆေးဝါး မှောင်ခိုမှုပမာဏဟာ ဒေါ်လာ ၇၁ ဘီလီယံထက်မနည်း ရှိခဲ့ပြီး ဒီအထဲမှာ Methamphetamine စိတ်ကြွဆေး မှောင်ခိုမှုက ၆၁ ဘီလီယံအထိ ရှိခဲ့တယ်လို့လည်း UNODC က ခန့်မှန်းထားပါတယ်။ ရွှေတြိဂံဒေသမှာ မူးယစ်ဆေးဝါးတွေ အများအပြား ဖမ်းဆီးမိနေတာကိုကြည့်ရင် ကမ္ဘာတဝန်း ကပ်ရောဂါထိန်းချုပ်ရေး အာရုံစိုက်နေချိန် မူးယစ်ဆေးမှောင်ခိုဂိုဏ်းတွေက အခွင့်ကောင်းယူနေတဲ့ လက္ခဏာတရပ် ဖြစ်ကြောင်းကိုလည်း UNODC က မကြာသေးခင်တုန်းကပဲ သတိပေးထားပါတယ်။
