ရောင်းအားကျနေတဲ့ စားသောက်ဆိုင်ကို ရောင်းအားတက်လာအောင် လုပ်နည်း လျှို့ဝှက်ချက်

ဆိုင်တစ်ဆိုင်မှာ အဓိက အရေးကြီးတာဟာ ရောင်းအားပါပဲ.. ရောင်းအားတက်လာတာနဲ့အမျှ Overhead တွေ ကျပြီး ကိုယ့်အတွက်အမြတ်ကျန်ပါလိမ့်မယ် Overhead ဆိုတာက Fix ဖြစ်နေတဲ့ ကုန်ကျစရိတ်တွေဖြစ်ပါတယ်.. ဥပမာ ဆိုင်ခန်းခ ဝန်ထမ်းလခ အခွန်အခ စသည်ဖြင့်ပေါ့.. ရောင်းအားကျတာနဲ့ အမျှ ဆိုင်ရှင်ပေါ်ကို ဒီဝန်ထုတ်ဝန်ပိုးက ပိလာပါလိမ့်မယ်..

ဆိုင်ရောင်းအား တက်ဖို့ အခြေခံအကျဆုံး အချက်သူံးချက်က 1. Food Quality 2. Menu Setup 3. Service တို့ဖြစ်ပါတယ်.. ဒီနေရာမှာတော့ ကျနော့် ကိုယ်တွေ့ တွေထဲကနေ သိမှတ်မိသမျှကို ဖလှယ်မှာဖြစ်တာကြောင့် အကျဉ်းရုံးပဲပြောပါမယ်.. တကယ်က ပြောရင်အကျယ်ကြီးဖြစ်နေမှာပါ..

ဆိုတော့ ပထမဆုံး Food Quality စားသောက်ဆိုင်တစ်ဆိုင်ဟာ အပြင်အဆင် ဘယ်လောက်ကောင်းနေနေ Marketing Plan ကြီး ဘယ်လောက်လန်ပြန်နေနေ ကိုယ့်ရဲ့ထုတ်ကုန်ဖြစ်တဲ့ အစားအသောက်အရည်အသွေးမကောင်းရင် အောင်မြင်မှုကိူ ကြာရှည်ထိန်းသိမ်းနိုင်ခြင်းမရှိပါဘူး.. Food Quality ဆိုတဲ့နေရာမှာ အရေးအကြီးဆုံး ပုဂ္ဂိုလ်က Chef ပါပဲ..

ကျနော်တို့ ဆိုင်ရှင်တွေက တခါတခါ Chef အတွက် ပိုက်ဆံကုန်ခံရမှာကို သိပ်နှမြောတတ်တယ်.. အကုန်အကျနည်းအောင် စျေးသက်သာတဲ့ Chef တွေကို လိုက်ရှာတတ်ကြတယ်.. တကယ်က ကိုယ့်တဆိုင်လုံးရဲ့ အသက်သွေးကြောထဲက တစ်ခုကို ကိုင်မယ့် သူဟာ လစာကောင်းကောင်း ပေးထားသင့်ပါတယ်.. ဒါမှလည်း အရည်အချင်းပြည့်ဝတဲ့ စားဖိုမှူး သို့မဟုတ် Kitchen Manager တစ်ယောက်ကို ပိုင်ဆိုင်နိုင်မှာဖြစ်ပါတယ်..

Chef ကောင်းကောင်း ဘယ်လိုရှာမလဲ.. ဒီအရည်အချင်းသုံးချက်နဲ့ ကိုက်ညီတဲ့ Chef ကိုရှာဖွေပါ.. တစ် လက်ဆိပ်ရှိပြီး လက်ရာမှန်တဲ့သူ.. နှစ် အလေအလွင့် ကို အနည်းဆုံးဖြစ်စေသူ.. သုံး ဆိုင်ကို ကိုယ်ဆိုင်လို သဘောထားတဲ့သူမျိုးကိုရှာပါ.. ဒါမျိုး ရှာရခက်မယ်လို့ထင်ပေမယ့် ဆိုင်ရှင်ဘက်က တုန့်ပြန်မှုနဲ့လည်း အများကြီး သက်ဆိုင်နေတတ်ပါတယ်.. ကျနော်ကတော့ အမြဲ အစမ်းခန့်ကာလ သတ်မှတ်ပြီး သာမာန်လစာရဲ့ သုံးပုံနှစ်ပုံပေးပြီး တစ်လအစမ်းခန့်လေ့ ရှိပါတယ်.. တစ်လအတွင်းမှာ မျက်စိဒေါက်ကြည့်ပြီး ကြိုက်ရင်အလုပ်ဆက်ခန့်ပြီး မကြိုက်ရင်မကြိုက်ကြောင်း ပြောပြပြီး လမ်းခွဲပါတယ်..

အရည် အချင်းကောင်းတဲ့ Chef တွေဟာ ဥပမာ ဟင်းပွဲအသစ် သို့မဟုတ် Today Special လို ဟာမျိုး အတွက် အမြဲစဉ်းစားနေတတ်တယ်.. ဒါပေမယ့် ထုတ်လာတဲ့ဟင်းပွဲကလည်း item အသစ်တွေဝယ်စရာမလိုပဲ ဆိုင်မှာ လူစားနည်းနေတဲ့ အသားငါးကိုပဲ အသစ်ဖြစ်အောင်ပြုပြင် ပြင်ဆင်ပြီး အထူး ဟင်းလျာဖြစ်အောင်လုပ်ပေးတတ်တယ်.. Menu ကို အမြဲ ပြောင်းလဲဖို့ စိတ်ကူးနေတယ်.. ဘယ်ဟင်းပွဲက ရောင်းရတယ် ဘယ်ဟင်းပွဲကတော့ မထွက်ဘူးဆိုတာကို စနစ်တကျ ယူထားတတ်တယ် စသည်ဖြင့် ကြည့်ရှုနိုင်ပါတယ်..

Chef ပြီးရင် ဒုတိယက စျေးဝယ်တဲ့ source ပဲ.. တတ်နိုင်သမျှ ရေခဲရိုက်အသားကိုရှောင်ပါ.. ဆိုင်မှာလည်း အများကြီးစျေးပေါလို့ ဝယ်ပြီး လှောင်ပြီး ခဲထားတာမျိုးကိုရှောင်ပါ.. အသားကောင်းကောင်း ဟင်းသီးဟင်းရွက် လှလှကောင်းကောင်းကို ရွေးသုံးပါ.. တန်ရာတန်ကြေးကို ယူပါ.. Quality ကောင်းတဲ့ ဟင်းတစ်ပွဲကို စားသုံးသူက တကယ်ပေးပြီး စားတတ်ပါတယ်.. စျေးပေါတိုင်း ရောင်းအားတက်တာ မဟုတ်ပါ.. ကိုယ်ပေးတာနဲ့ စားရတာနဲ့တန်ရင် Customer က လာတာပါပဲ.. ဆိုတော့ ကိုယ်နဲ့ အတူ Grow Together ဖြစ်မယ့် Chef ကိုရှာပါ.. ပစ္စည်းကို စျေးပေါတာထက် တန်ပြီးကောင်းတဲ့ ပစ္စည်းမျိုးကို သုံးပါ.. Quality မပြည့်မှီဘူးဆို မနှမြောနဲ့လွှင့်ပစ်ပါ..

နံပါတ်နှစ် Menu Setup ဒီနေရာမှာလည်း Chef ကအရေးကြီးသလို ကိုယ်တိုင်ဦးဆောင်နေတဲ့ဆိုင်ရှင်ကလည်း သိပ်အရေးကြီးပါတယ်.. ကိုယ့်ဆိုင်ရဲ့ trend ကိုကိုယ်သိရမယ်.. ဥပမာ တရုတ်အစားအစာဆိုပြီး မြန်မာထမင်းဟင်းတွေတွဲ မရောင်းရဘူး တွဲချင်ယိုးဒယားစာမျိုး တွဲလို့ရတယ်.. ချစ်တီးထမင်းဆိုင်ဆိုပြီး သင်းဘောသီးထာင်း ခေတ်စားလို့ဆိုပြီး တွဲရောင်းလို့မရဘူး..

Customer က ကိုယ့်ဆိုင်ရဲ့ specialize ဖြစ်တာကို ခေါင်းထဲဆွဲနေဖို့လိုတယ်.. ဆိုတော့ Menu Setup လုပ်တဲ့အခါ ပထမဆုံးက ကိုယ်ဆိုင်က ဘာပုံစံသွားမလဲဆိုတာကို ရွေးချယ်ရမယ်.. ပြီးရင် ကိုယ့် Chef က ဘာတွေတကယ်ကောင်းတာလဲဆိုတာကို သိရမယ်.. ဒါမှ အကောင်းဆုံးအရသာကို ပေးနိုင်မှာဖြစ်တယ်..

ဒုတိယအနေနဲ့မှာ Menu ဟာ ပြွတ်သိပ်ကြပ်ညပ်နေဖို့မလိုဘူး.. Customer ကို ခေါင်းရှုပ်အောင်မလုပ်ရဘူး.. မကောင်းလိုက်ကောင်းလိုက် ဟင်းပွဲတစ်ရာထက် တကယ်ကောင်းတဲ့ ဟင်းဆယ်ပွဲပဲပါတဲ့ Menu က ပိုပြီး effective ဖြစ်တယ်.. ဒုတိယပိုင်း Menu setup မှာ အပိုင်းပိုင်းခွဲခြားထားရမယ်.. ပုံမှန်စားသောက်ဆိုင်တစ်ခုရဲ့ Menu တွေကတော့ ဒီပုံစံလာတယ်.. Breakfast Appetizer House Special Main Course Soup Vegetables and salads Drinks Dessert ဆိုပြီး အဆင့်ဆင့်သွားပေးရတယ်..

Appetizer ဆိုတာက အစာပြေ အမြည်း စာလေးတွေကိုခေါ်တာဖြစ်ပြီး House special ကတော့ ကိုယ့်ဆိုင်ရဲ့ best seller item တွေကိုဆိုလိုတယ်.. Menu setup မှာလျို့ဝှက်ချက်ကတော့ Customer ကို ခဏစောင့်နေရတုန်းမှာ အဆင့်ဆင့် စားနိုင်အောင်စီစဉ်ပေးတာပါပဲ.. ဟင်းပွဲကြီးတွေမှာထားတုန်းမှာ Appetizer Menu တွေကို ရှေ့ထုတ်ပေးတာဟာ စောင့်နေရင်း အစာပြေစားဖို့ပါ.. အဲ့ဒီထဲမှာ ကိုယ်က item တစ်ခုကို ရောင်းချင်တယ်ဆိုရင် တခြား item အသစ်တစ်ခုကို ထုတ်ပြီး စျေးခပ်မြင့်မြင့်တင်ထားပြီး ယှဉ်ပြထားရတယ်.. ဒါမှ ကိုယ်ရောင်းချင်တဲ့ item ကို ကိုယ်ရောင်းချင်တဲ့စျေးနဲ့ ရောင်းထွက်မှာဖြစ်တယ်..

နောက်ပြီး menu ကစာအုပ်လိုမဟုတ်ပဲ ကတ်ပြားလိုက်ကြီးဆိုရင် ကတ်ပြားရဲ့ ညာဘက်အပေါ်ဆုံးဒေါင့်ကွက်ဟာ လူကြည့်အများဆုံး အကွက်ဖြစ်တာကြောင့် စျေးကြီးပြီး ကိုယ့်အတွက်လည်းကျန်မယ့် ဟင်းပွဲမျိုးတွေကို ဖော်ပြထားသင့်တယ်.. ဘယ်ဘက်ထောင့် အောက်ဆုံးကွက်ဟာ လူကြည့်အနည်းဆုံးဖြစ်တာကြောင့် သိပ်အားမပါလှတဲ့ လက်ဘက်ရည်ကော်ဖီဆိုတာမျိုးကို ထားသင့်တယ်.. တခြားပြောစရာတွေအများကြီးပါပဲ အဲ့တော့ ဟင်းပွဲနည်းနည်းနဲ့ စနစ်တကျစီစဉ်ထားတဲ့ Menu ဟာ ပုံနေဘလပွနဲ့ လုပ်ထားတဲ့ Menu ထက် ပို effective ဖြစ်တယ်ဆိုတာသိကြရမယ်.. ကိုယ့်chef ကို Menu ကို သုံးလ သို့မဟုတ် ခြောက်လမှာ တစ်ခါ Renew ပြန်လုပ်ဖို့ ပြောရမယ်..

နောက်ဆုံး ပြောစရာအများဆုံးနဲ့ အကျယ်ဆုံး အပိုင်းကတော့ Service ပဲ.. စားပွဲထိုးတွေကို အရည်အချင်းပြည့်အောင် အလုပ်ကိုလေးစားတတ်အောင် သင်ကြားပေးရမယ်.. ၁။ Menu ကို သိရှိနားလည်အောင် သင်ပေးတာမျိုး.. ၂။ ယူနီဖောင်းကို အကုန်အကျခံပြီး ကောင်းအောင် ဆင်ပေးတာမျိုး.. ၃။ Bonus ကို တစ်ဦးချင်းစီမယူစေပဲ မျှမျှတတခွဲဝေ ပေးတာမျိုး.. ၄။ နေ့စဉ် Briefings ပေးတာမျိုး လုပ်ကြရမယ်..

Menu ထဲက အစားအသောက်တွေကို ချက်ပြီး စားပွဲထိုးတွေကိုပါ မြည်းခိုင်းပါ.. ဒါမှ သူက Customer တွေကို ပြန်ပြောပြတတ်မှာဖြစ်တယ်.. ဘာလေးကတော့စားကောင်းတယ် ဘယ်လိုလေးတွဲစားရင် လိုက်ဖက်တယ်ဆိုတာမျိုး ပြောပြတတ်လာပါလိမ့်မယ်.. Customer ကလည်း အဲ့ဒီလိုဂရုစိုက်ခံရတာကို ကြိုက်ပါတယ်.. ယူနီဖောင်း အလုပ်တစ်ခုမှာ အဲ့အလုပ်ပေါ်ကို ဂုဏ်ယူစေလောက်တဲ့ ယူနီဖောင်းဟာ အမြဲလိုအပ်တယ်.. စမတ်ကျကျ ချုပ်လုပ်ပေးထားတဲ့ ယူနီဖောင်းနဲ့စားပွဲထိုးဟာ ပေတီပေစုတ်မဝတ်ရဲဘူး.. ကိုယ့်ဆိုင်လည်း ဂုဏ်မငယ်ဘူး.. ထို့အတူ စားသုံးသူကိုယ်တိုင်လည်း စိတ်သန့်တယ်လေ..

နောက်တစ်ခုကတော့ Unity ပေါ့.. အဲ့လိုစည်းလုံးတဲ့စိတ်ကလေးလည်း ဖြစ်သွားစေတယ်.. ဒါဟာ ဆိုင်ရဲ့ image တစ်ခုပဲ Bonus စားပွဲထိုးတွေအချင်းချင်းသွေးကွဲကြတာက Tip ရတယ်မရဘူးကစတာပဲ.. အဲ့ဒီကနေစားပွဲလုကိုင်တာ သူ့စားပွဲဆို ငါကဝင်မကူဘူးဆိုပြီး Team work ကွဲတာဟာ အဲ့ဒီကစတာပဲ.. မန်နေဂျာကို သေချာပြောပြီး tip ကို Tip Jar တစ်ခု လုပ်ထားပြီးစုထားပါ.. ပြီးလို့ လကုန်ရင် အားလုံးအညီအမျှခွဲယူပါ.. Briefing မှာလည်းထည့်ပြောပါ.. ဒီလိုလုပ်တာဟာ ညီညွတ်စေချင်လို့ ဒီ tip ဟာ သူတစ်ယောက်တည်းကောင်းလို့မဟုတ်ဘူး အားလုံး က ဘေးက ပံ့ပိုးလုပ်ကိုင်နေလို့ ရတာဖြစ်တယ်ဆိုတာ နားလည်အောင်ပြောပါ..

Team work မိမိချိတ်ဆက်နိုင်အောင် ကိုယ်က တည့်မတ်ပေးပါ.. Briefing ဒါဟာ အရေးကြီးတဲ့ထဲပါပါတယ်.. တစ်ချို့ကလည်း Briefing ဆိုတာ တန်းစီပြီး ဆူရတယ်လို့ထင်တယ် မဟုတ်ပါဘူး.. Briefing ဆိုတာ တစ်ရက်စာ အဆင်ပြေမှုမပြေမှုတွေကို ပြောဆိုတိုင်ပင်တာ ချီးမွမ်းသင့်တာ ကိုချီးမွမ်းတာ ဆုံးမသင့်တာကို နားဝင်အောင်ဆုံးမတာဖြစ်ပြီး လုပ်ကိုလုပ်ရမယ့်အရာတွေကို နေ့စဉ်နားဝင်အောင်ရိုက်သွင်းတာသာဖြစ်တယ်.. Briefing ပေးတဲ့ဆိုင်နဲ့ မပေးတဲ့ဆိုင်ဟာ အကျိူးသက်ရောက်မှုသိပ်ကွာတယ်..

ပြီးတော့ ဒီအချိန်ဟာ စာပွဲထိုးအားလုံးနဲ့ ကိုယ်နဲ့ရဲ့ တစ်ခုတည်းသော မပျက်သင့်တဲ့ communication ပဲ.. ပြီးတော့ အရေးအကြီးဆုံး က kitchen ရော အရှေ့ service ရောကို သင့်လျော်သော Bonus ခံစားခွင့်ကိုပြောပြထားပါ.. ပြောပြရင်း တကယ်ထိရောက်ရင်လည်း တကယ်ပေးပါ ဒါအရေးအကြီးဆုံးပါပဲ.. ဝန်ထမ်းဟာ ဝန်ထမ်းဆိုပေမယ့် ကိုယ်နဲ့ Grow together ဖြစ်အောင်ဆွဲဆောင်ပါ.. ဒါကိုယ့်အရည်အချင်းပါပဲ..

ပြောရင်တော့ အကျယ်ကြီးပါ.. ဒါပေမယ့် ဒီအနှစ်ချုပ်အချက်ကလေးတွေ ပြင်ဆင်နိုင်မယ်ဆို သင့်ဆိုင်ဟာ ရောင်းအားသိသိသာသာ တက်လာပါလိမ့်မယ်.. စာကိုဆုံးအောင်ဖတ်ပေးလို့ကျေးဇူးတင်ပါတယ်.. ဆိုင်ပိုင်ရှင်များ ဒီထက်ရောင်းအားတက်ပြီး အောင်မြင်ကြပါစေ.. (Aung Kyaw Moe)

The post ရောင်းအားကျနေတဲ့ စားသောက်ဆိုင်ကို ရောင်းအားတက်လာအောင် လုပ်နည်း လျှို့ဝှက်ချက် appeared first on White Sone.

Crd