ယူကရိန်း နယ်စပ်မှာ ရုရှားဘက်က ရုတ်တရက် စစ်အင်းအား တိုးမြှင့်ချထားနေပြီး ယူကရိန်းရဲ့ Crimea ဒေသကိုလည်း သိမ်းပိုက်ထားတဲ့ အပေါ်မှာ စိုးရိမ်နေကြောင်း အမေရိကန် သမ္မတ Joe Biden က ရုရှား သမ္မတ Vladimir Putin ကို အင်္ဂါနေ့က တယ်လီဖုန်းဆက် ပြောဆိုခဲ့ပါတယ်။
တင်းမာနေတဲ့ အခြေအနေကို ပြေလျော့သွားစေရေး ရုရှားဘက်က ဆောင်ရွက်ဖို့လည်း အမေရိကန် သမ္မတက ပြောဆိုခဲ့ကြောင်း သမ္မတ အိမ်ဖြူတော်က ပြောပါတယ်။ ယူကရိန်းနိုင်ငံရဲ့ အချုပ်အချာအာဏာ နဲ့ နိုင်ငံ တည်တံ့ ခိုင်မြဲရေး အတွက် အမေရိကန်ဘက်က မမှိတ်မသုန် ပိုင်းဖြတ်ထားတယ်လို့လည်း သမ္မတ Biden က ရုရှား သမ္မတကို ပြောဆိုခဲ့ကြောင်း အမေရိကန် သမ္မတ အိမ်ဖြူတော်က ထုတ်ပြန်ပါတယ်။ ဒါပေမယ့်လည်း အမေရိကန် သမ္မတရဲ့ ပြောဆိုချက် အပေါ် ရုရှား သမ္မတဘက်က တုံ့ပြန်ချက်ကိုတော့ အမေရိကန် သမ္မတ အိမ်ဖြူတော်က သုံးသပ်ချက် မပေးပါဘူး။
ယူကရိန်းရဲ့ Crimea ကျွန်းဆွယ်ကို ၂၀၁၄ ခုနှစ်မှာ ရုရှားက သိမ်းယူခဲ့တာကို အမေရိကန်နဲ့ အနောက် မဟာမိတ် နိုင်ငံတွေက ကန့်ကွက် ရှုတ်ချပေမယ့်လည်း ဒီလုပ်ရပ်ကို ဟန့်တား ဆောင်ရွက်မှု မရှိခဲ့ပါဘူး။ အဲဒီနောက်ပိုင်းမှာ ရုရှား ထောက်ပံ့ထားတဲ့ ခွဲထွက်ရေးသမားတွေက ယူကရိန်း အရှေ့ပိုင်း Donetsk ဒေသတွင်းမှာ ယူကရိန်း အစိုးရတပ်တွေနဲ့ တိုက်ခိုက်နေတာပါ။ ယူကရိန်း တိုက်ပွဲတွေ အတွင်း သေဆုံးရသူက ၁၃,၀၀၀ နီးပါး ရှိကြောင်း ကုလသမဂ္ဂက ပြောဆိုထားပါတယ်။
credit – VOA
