စိန့်ပီတာစဘတ်မြို့မှာ ကျင်းပခဲ့တဲ့ ရုရှားရေတပ်နှစ်ပတ်လည်နေ့ ချီတက်ပွဲမှာ ရုရှားသမ္မတဗလာဒီမာပူတင်က သူတို့အနေနဲ့ ခေတ်မီလက်နက်တွေ ပိုင်ဆိုင်ထားတဲ့ အစွမ်းသတ္တိကြောင့် ဘယ်လိုရန်သူမျိုးကိုမဆို လိုအပ်လာရင် ရှာဖွေတိုက်ခိုက်နိုင်စွမ်းရှိနေပြီး သေချာပေါက်လက်တုံ့ပြန်မှာဖြစ်တယ်လို့ ပြောဆိုလိုက်ပါတယ်။
အဆိုပါချီတက်ပွဲကိုတော့ ရုရှားစစ်သည်ပေါင်း လေးထောင်ကျော် နဲ့ ရေတပ်သင်္ဘော ၅၅ စီး၊ ဒုံးကျည်တွေတပ်ဆင်ထားတဲ့ Borey-A နူကလီးယားရေငုပ်သဘောင်္တစ်စီးတို့ အင်အားပြခဲ့ကြပါတယ်။
“ဒီနေ့မှာ ရုရှားရေတပ်က နိုင်ငံရဲ့ အကျိုးစီးပွားနဲ့ ဇာတိနိုင်ငံကာကွယ်ရေးအတွက် လိုအပ်တာတွေအားလုံးရှိနေပါပြီ” လို့ ပူတင်က မိန့်ခွန်းချွေခဲ့ပါတယ်။
ဒါ့အပြင် ရေတပ်အင်အားကြီးနိုင်ငံတွေများစွာထဲမှာမှ နေရာမှန်ကို ရယူထားပြီး နောက်ဆုံးပေါ်စနစ်တွေအသုံးပြုထားတဲ့ မြင့်မားတိကျတဲ့ လက်နက်တွေကိုလည်း တပ်ဆင်ထားပြီးဖြစ်တာကြောင့် အဆက်မပြတ်အောင်မြင်မှုတွေနဲ့ တိုးတက်အောင်ရှိနေတယ်လို့လည်း ဆိုခဲ့ပါတယ်။
“ ရုရှားက ဘယ်လိုရေပေါ်၊ရေအောက်၊ လေကြောင်းတွေမှာမဆို ရန်သူကို ရှာတွေနိုင်ပြီး လိုအပ်လာရင် သေချာပေါက်ထိုးနှက်နိုင်စွမ်းရှိနေပါတယ်” လို့ ပူတင်က ခြိမ်းခြောက်စကားဆိုခဲ့ပါတယ်။
ကိုဗစ်-၁၉ ကြောင့် ကြည့်ရှုသူတွေမတက်ရောက်နိုင်ခဲ့တဲ့ ချီတက်ပွဲမှာ ရုရှားကာကွယ်ရေးဝန်ကြီးဌာနက အသံထက်မြန်တဲ့ Zircon နူကလီးယားဒုံးကျည်ကို အောင်မြင်စွာပစ်လွှတ်စမ်းသပ်နိုင်ခဲ့ပြီလို့လည်း ကြေညာခဲ့ကြောင်း သိရပါတယ်။
အဆိုပါလက်နက်ကတော့ ဖရီးဂိတ်စစ်ရေယာဉ် Admiral Gorshko က ပင်လယ်ဖြူအတွင်း စမ်းသပ်ပစ်လွှတ်ခဲ့တာဖြစ်ပြီး အသံထက် ၇ ဆ မြန်ဆန်ခဲ့ပြီး ကီလိုမီတာ ၃၅၀ အကွာအဝေးမှာရှိတဲ့ Barents ပင်လယ်ကမ်းရိုးတန်းမှာရှိတဲ့ မြေပြင်ပစ်မှတ်ကို ထိမှန်ခဲ့တယ်လို့လည်း ဆိုပါတယ်။
Zircon ဒုံးကျည်ရဲ့ နည်းပညာပိုင်းနဲ့ နည်းဗျူဟာပိုင်းဆိုင်ရာ လက္ခဏာအားလုံးကို အတည်ပြုပြီးဖြစ်တယ်လို့လည်း ကာကွယ်ရေးဝန်ကြီးဌာနက ပြောကြားခဲ့ပါတယ်။
ရုရှားဘက်က စမ်းသပ်မှုနဲ့ ပတ်သက်ပြီး နေတိုးအဖွဲ့က “ဒုံးကျည်အသစ်စမ်းသပ်မှုဟာ အခြေအနေတွေကို သိသိသာသာမတည်မငြိမ်ဖြစ်စေပြီး ယူရို-အတ္တလန္တိတ်ဒေသတစ်ခုလုံးမှာ လုံခြုံရေးနဲ့ တည်ငြိမ်မှုကို ပျက်ပြားစေပါတယ်” လို့ မှတ်ချက်ပြုခဲ့ပါတယ်။
လက်နက်အမျိုးအစားသစ်တွေ ပေါ်ပေါ်လာတာကလည်း ရုရှားခေါင်းဆောင်တွေရဲ့ တင်းမာမှုနဲ့ တွက်ချက်မှုမှားယွင်းခြင်းတွေ တိုးမြင့်လာတာဖြစ်တယ်လို့လည်း နေတိုးဘက်က ရှုမြင်နေခဲ့ပါတယ်။
River News
မူရင်းရေးသားသူအားလေးစားစွာခရက်ဒစ် ပေးပါသည်။
ကူးယူမျှဝေဖော်ပြခြင်းသာဖြစ်ပါသည်။
